السبت، مايو 27، 2006

حاجات صغنونة

اصدقائي عذرا تأخرت كثيرا عن كتابة هذه التفريجة ولكن بعد تفكير طويل قررت الكتابة عن ما أحب فجأة ودون تفكير ربما لأن الأفكار تفسد المشاعر أو لأنني لست بكامل قواي العقلية هذه الأيام
أكتر حاجة تفرحني بوسة صريحة فجأة وبدون مبرر
مراقبة نقط المية وهيى بتتزحلق على جسمي بعد دش سخن طويل في اخر يوم طويل مرهق
سيجارتين كنت ناسيهم الاقيهم بعد ما السجاير تخلص وندخنهم انا وواحد او واحدة صاحبتي
الفرحة في عيون صحابي لما تحصلي حاجة كويسة
اغنية نقرر نغنيها فجأة انا واللي معايا بصوت عالي وتبقى جميلة
اول نفس من سيجارتي بعد اللقاء الحميم
ونقطة العرق السخنة لما تحرق عيني واحنا في منتصف اللقاء
صوت فيروز فجأة في اخر مكان متوقع تسمع فية فيروز ميكروباص مثلا او قهوة بلدي
تمشية طويلة الصبحية وقهوة مظبوط كويسة في كافيتريا ما رحتهاش قبل كدة
اشتكي همي على ورقة وارميها لبير مسعود
اقعد على البحر وارميله سيجارة وردة فلوس فضة اي هدية صغيرة زي كدة
الاحساس بالراحة زي العيال بعد ما اخلص عياط على صدر امي مرة كل اربع خمس سنين لنها دايما ما بتسألنيش انا بعيط لية
ورقة ستيللا عليها التاريخ والذكرى واسامي اصحابي اللي كانوا معايا
نص كويس اكتبه من غير ما اقصد
شوارع وسط البلد بالليل وهيا بتسلم عليا قبل ما اروح
مكالمة تليفون اول ما اصحي وصوت اعرفه كويس يقولي صباح الخير
بنت جميلة تعاكسني في مكان عام وما اشوفهاش تاني ابدا فتفضل في خيالي تحلو.. وتحلو
اول حضن بيني وبين واحد صاحبي لسة راجع من السفر
منظر الدنيا الواسعة وهيا بتفلت من عنيا من شباك القطر
حلم جميل اشوف فية حد واحشني اوي وما ينفعش اشوفه
ناس ما عارفهمش في قاعة غلبانة في مركز ثقافي بيصقفولي بعد ما يخلص عرض الفيلم
ريحة شعر حبيبتي اول ما اصحى من النوم اللي تفضل ماسكة مناخيري حتى بعد دش الصبح بدري

7 تعليقات:

Blogger Maat يقول...

what u wrote here just took me to another time and place.....a different state of mind....
yaaaaaaaaaaaaah...

6:12 ص  
Blogger مراكب ورق يقول...

انا متأكد انك من مكان تاني وزمان تاني انتي كمان ولو ما كانش كدة ما كنتيش تعرفي تقري اللي كتبته
متشكر

6:38 ص  
Blogger مراكب ورق يقول...

أزال أحد مشرفي المدونة هذا التعليق.

6:38 ص  
Blogger Maat يقول...

LOL, yeah i gotta admit...it was reeeeally hard to read, if i wasnt interested i wouldn't have bothered...seriously, good choice of font size and color! worth it though.

5:52 م  
Blogger مراكب ورق يقول...

يا ستي كتر خيرك وخطوة عزيزة

7:55 ص  
Blogger i love you يقول...

جمييييييييييييييلة جدا
التفريجة دي
خلتني
اشعر
براحة
غريبببببببببببببببببة

4:12 ص  
Blogger eman يقول...

كان نفسى ما تخلصش
و أفضل ألاقى حاجات تانية

8:24 م  

إرسال تعليق

الاشتراك في تعليقات الرسالة [Atom]

<< الصفحة الرئيسية